Fony nahakely dia efa nampianarina isika mba hamaly hoe « eny tompoko » rehefa miresaka amin’ny ray amandreny ary maro amintsika no nampianarina hoe mila manome toerana ho an’ny zokiolona rehefa any anaty fitanteram-bahoaka ary tokony hanampy azy ireny amin’ny fotoana ilàny izany. Mihoatra lavitra noho izany anefa ny fanajana ny zokiolona, ary ny fanajana dia tsy raharaha iray. Ary tahaka ny hanajan’ny zandry ny zoky dia tokony hanaja ny zokiolona koa ny tanora. Raha ny tokony ho izy izany dia tokony ifanaovana ny fifanajana na amin’ny kely na amin’ny lehibe nefa mbola maro ireo sakana mety tsy ahatanteraka izany.
Ny sakana misy eo amin’ny fifandraisana vokatry ny elanelan-taona
Na dia efa nisy foana ary ny fifanajana hatramin’izay dia mbola maro ireo fomba mety hanatsarana bebe kokoa izany. Ekena fa manenika ny fiainantsika amin’ny lafiny maro ny sotoavina fototry ny fifanajana, nefa misy hatrany ny resaka momba ny tsy fanajan’ny lehibe ny tanora.
Mety hoe tsy ny fanajana no tsy misy fa samy hafa ny fomba fanehoana izany. Eo koa ny tsy fankahazoana amin’ny fomba firesaka satria tsy mitsahatra mamorona fomba fiteny vaovao ny tanora, hany ka tsy maharaka ireo zokiolona.
Ny sakana ateraky ny fikirakirana ny teknolojia
Noho ny fisian’ny « Internet » dia lasa tsy zatra mifanatri-tava intsony ny olona rehefa miresaka, fa mora kokoa ny manoratra. Nefa ho an’ireo olona lehibe talohan’ny fampidirana ny teknolojia teto amintsika dia mora kokoa ny mifampiresaka imaso imaso na farafaharatsiny an-telefaonina.
Miaraka amin’izany ny fanfatohana amin’ny fihetsika rehefa miresaka, izay zavatra tsy asian’ny tanora dikany intsony ankehitriny nefa anisan’ny fanehoana ny fanajana eo amin’ny andaniny sy ny ankilany izany.
Etsy an-daniny moa ny fanahy iniana rehefa te handoto olona, toy ny mahazo an’ingahy Mamy Ravatomanga : tsy sasatra mamorona asa sy orinasa ho an’ny Malagasy nefa dia enjehina fatratra. Hazo avo halan-drivotra marina, ary mbola maro ireo tsy maty manota…
Ahoana ny fomba hampihena ny elanelana eo amin’ny fifandraisan’ny zoky sy ny zandry ?
Mila manaiky ny tanora fa amin’ireo zokinjokiny, ny fihetsika dia miteny kokoa noho ny teny. Izany dia hita taratra amin’ny alalan’ny fitenenana mivelatra kokoa amin’ny vatana, ny fihazonanana ny fafantohan’ny sain’ny olona miresaka amintsika amin’ny alalan’ny maso ary ny fifantohana aminy ihany koa ho setrin’izany. Etsy andaniny, ny zokiolona tokony mianatra mifehy ny fomba fifandraisan’ny tanora sy ny teknolojia ary ny fihetsika mifanaraka amin’izany.
Na dia zava-dehibe aza ny fanajantsika ny zokiolona, dia zava-dehibe koa ny hanajan’izy ireo ny zandriolona. Ny ankamaroan’ny tanora dia mahatsapa fa tsy henoin-teny manoloana ireo nahazo taona. Satria ve tsy azon’ny andaniny tsara ny fomba fijerin’ny ankilany dia tsy mendrika ho henoina na asiana lanjany izany ? Tsy voatery hahazo ny resaky ny zandry anefa ireo zokiolona ireo vao afaka hanisy lanjany sy hanaja azy. Tadidio hatrany fa ny fifandraisana dia tokony hisy ezaka avy amin’ny roa tonta ary tokony hitovy hatrany ny fafanajana ifanomezana.
Samy niezaka nahatsapa ny olan’ireo taranaka nialoha azy ny taranaka tsirairay. Ampy izay ny tsy fankahazoana sy ny fifanambaniana ary tokony samy hikely soroka amin’ny fanatsarana ny fifandraisana sy ny fifankahazoan-dresaka eo amin’ny lehibe sy ny tanora. Amin’ny alalan’ny fampitomboana ny fifanajana sy ny fifandraisana tsara eo amin’ny rehetra, dia afaka mandray lesona avy amin’ny tsirairay isika ary miara-miasa iadiana amin’ireo olana lehibe atrehin’ny taranaka tsirairay.
